Абай облысының спортшылары XXV Сурдлимпиада ойындарында қола медаль иегерлері атанды
15–26 қараша күндері Жапонияның Токио қаласында төрт жылда бір өтетін XXV Сурдлимпиада ойындары өтуде.
Абай облысынан дзюдо спорт түрінен екі спортшы –Какетаев Алтынбек (60 кг), 2024 жылғы Әлем чемпионатының жеңімпазы,Жетпісбаева Айым (48 кг), 2024 жылғы Азия–Тынық мұхит ойындарының күміс жүлдегері ел намысын қорғады.
Екі спортшымыз да жоғары нәтижелер көрсетіп, Сурдлимпиада ойындарының қола медаль иегері атанды.Какетаев Алтынбек 60 келі салмақ дәрежесінде өткен жарысқа 16 спортшы қатысты.
Алғашқы белдесуде Алтынбек түркиялық Нурулла Дундарды таза жеңді. Екінші айналымда бразилиялық Дантас Педро Фелипеге жол берді.
Жұбаныш белдесуінде жапониялық Кира Акироны айқын жеңіп, қола жүлдеге таласуға мүмкіндік алды.Шешуші кездесуде нидерландық Вестерхоф Альбертті жеңіп, Сурдлимпиада ойындарының қола медалін иеленді.
Жетпісбаева Айым 48 келі салмақта өткен жарысқа 7 спортшы қатысты. Алғашқы айналымда Айым үндістандық Kesarwani Pragati-ді жеңді. Екінші кездесуде НДА өкілі Поздеева Алинаға есе жіберді.
Қола медальға арналған белдесуде түркиялық Kucukarslan Elif-ті жеңіп, Сурдлимпиада ойындарының қола медалін жеңіп алды.
