Мақаншы ауданы Семейге 16 қанатты киіз үй тарту етті
Семейде өтетін «Туған жерге туыңды тік» инвестициялық форумы қарсаңында Мақаншы ауданы облыс орталығына 16 қанатты киіз үй тарту етті.
Абайдың 180 жылдығына орай сыйға тартылған киіз үй бір мезетте 150-ге жуық адамды қабылдай алады. Ұлттық нақышта безендірілуіне аудан кәсіпкерлері ұйытқы болып, қолдау көрсеткен.
Түйемойнақ аралында бой көтерген киіз үй қала тұрғындары мен қонақтарына ашық форматта қызмет етеді. Мұнда ұлттық тағамдар ұсынылып, келушілер серуендеп жүріп дәм тата алады.
Киіз үйдің ашылуына облыс әкімі Берік Уәли, Мақаншы ауданының ақсақалдары мен тұрғындары қатысты.
«Абайдың тойына тартуды алғаш болып облысымыздың шеткі, шекарадағы ауданы Мақаншы өңірінің бастап жатқанының үлкен мағынасы бар деп ойлаймын. Бұл басқа аудандарға үлгі боларлық іс, игі бастама», – деді аймақ басшысы.
Облыс әкімі осыдан үш ай бұрын Мақаншы ауданына барған сапары аясында кезінде өнерімен елді тамсандырған «Інжу-Маржан» ансамблін қайта жандандыру қажеттігін айтқан болатын. Бүгінде бұл бастама жүзеге асып, тиісті қаржы бөлініп, ансамбль өз жұмысын қайта бастады. Шара барысында өнер ұжымы жиналғандарға өнерін көрсетті.
