«Makimsan» компаниясымен ынтымақтастық туралы меморандумға қол қойылды
Облыс әкімі Берік Уәли Түркияның «Makimsan A.T.S St.» компаниясының президенті Атилла Күршат Дикчи бастаған инвесторлар тобымен кездесті.
1969 жылы құрылған «Makimsan» компаниясы Түркияда және шет елдерде халықаралық әуежайлар, қуатты жылу электр орталықтары, Түркия, ТМД елдері, Еуропа және Африка аумағындағы автомобиль жолдары, тоннельдер мен көпірлер, метро, теміржол жүйелері, әкімшілік ғимараттар, ауруханалар, мектептер мен балабақшалар сияқты ірі құрылыс жобаларын жүзеге асырған. Компанияның жалпы халықаралық жобаларының құны 2,5 млрд АҚШ долларынан асады.
Кездесуде аймақ басшысы мен «Makimsan A.T.S St.» компаниясының президенті өзара түсіністік пен ынтымақтастық туралы меморандумға қол қойды.
Меморандум аясында Семей қаласындағы бірнеше көшелерге темір жол үсті көпірлерін салу, «Мәңгілік Ел» көшесі мен Бейбітшілік аралын жалғайтын жаяу жүргінші көпірін тұрғызу, Семей, Курчатов қалаларында және Аягөздегі сүзу алаңында кәріз-тазарту нысандарын, Семей қаласында қоқыс полигонын, Селевин көшесінен Шығыс кентіне дейінгі бағытта автокөлік және жаяу жүргіншілерге арналған көпір салу, Семейдегі аспалы көпірді қайта жаңғырту, жаңа әкімшілік-іскерлік орталықта заманауи әкімшілік ғимараттар салу сынды бірқатар ірі инфрақұрылымдық жобаларды іске асыру жоспарланып отыр. Бұл жобалар өңірдің жол инфрақұрылымын жаңғыртып, экологиялық жағдайды жақсартуға, тұрғындарға қолайлы әлеуметтік орта қалыптастыруға бағытталған.
Аймақ басшысы түркиялық инвесторларға өңірге деген қызығушылықтары үшін алғыс айта отырып, алдағы уақытта жобалардың сәтті жүзеге асатынына сенім білдірді.
«Мемлекет басшысы Қасым-Жомарт Кемелұлы Тоқаевтың «Жаңа инвестициялық кезеңді бастау керек» деген тапсырмасына сәйкес өңірімізде инвесторларға қолайлы жағдай жасап келеміз. Абай облысы – жаңадан құрылғанымен, әлеуеті зор аймақ. Табиғи ресурстарымыз, өндірістік инфрақұрылымымыз және қолайлы географиялық орналасуымыз өңірдің тұрақты дамуына берік негіз бола алады. Президентіміз атап өткендей, тарихи және рухани құндылықтарға негізделген қазақ-түрік ынтымақтастығы кеңейтілген стратегиялық әріптестік аясында дәйекті түрде дамып келеді. Сондықтан бұл жобалар облысымыздың дамуына серпін беріп, халықтың өмір сапасын арттыруға, жаңа жұмыс орындарын ашуға және қаламыздың заманауи келбетін қалыптастыруға ықпал етеді деп сенеміз. Абай облысының әкімдігі өз тарапынан заң аясында барлық қажетті қолдауды көрсетуге дайын» деді облыс әкімі.
