Абай облысында экстремизм мен терроризмге қарсы “Белгісіз бағыт” қойылымы қала студенттеріне арнайы көрсетілді

Абай атындағы музыкалық драма театрында «Дариға-ай жастар» театры дайындаған «Белгісіз бағыт» қойылымы қала студенттері мен жастар қауымына арнайы ұсынылды.

Көрермендер қатарында Абай облысы әкімінің орынбасары Мейрлан Раханов және Абай облысының Жастар саясаты мәселелері басқармасының басшысы Олжас Бейсенбаев болып, олар жас буын арасында ұлттық құндылықтарды, қауіпсіздік мәдениетін және қоғамға пайдалы өмір салтын насихаттаудың маңызын атап өтті.

 Көрермен назарына ұсынылған «Белгісіз бағыт» қойылымы – жастарды дұрыс бағытқа ынталандыруға, олардың санасында қауіпсіздік мәдениетін қалыптастыруға бағытталған. Қойылымның басты мақсаты – қоғамдағы ең өзекті мәселелердің бірі болып табылатын экстремизм мен терроризмнің алдын алу, жастарды түрлі жағымсыз әсерлерден қорғау және олардың өмірлік ұстанымдарын нығайту. Өнер тілімен жеткізілген бұл ой – жас ұрпаққа терең ой салып, саналы шешім қабылдауға үйретеді. Бұл бастама облыс әкімінің қолдауымен, Жастар саясаты мәселелері басқармасының ұйымдастыруымен жүзеге асып отыр, – деді Олжас Бейсенбаев өз сөзінде.

Бүгінгі шараға қатысқан жастар ерекше әсер алып, қойылымнан терең ой түйді.

Бүгінгі қойылымнан аларым көп болды. Өте мағыналы, достықты да, отбасылық құндылықтарды да дәріптеген ерекше қойылым болды. Сонымен қатар, тегін, студенттерге қолжетімді. Ұйымдастырушыларға алғыс айтамын, — деп пікірімен бөлісті көрермендердің бірі.

Аталған іс-шара – жас буынға бағытталған мемлекеттік саясаттың бір бөлігі. Ол жастардың бос уақытын тиімді өткізуге, ұлттық және азаматтық құндылықтарды қалыптастыруға, сондай-ақ қоғамдағы қауіпсіздік мәселелеріне жауапкершілікпен қарауға серпін беруді көздейді.