Сыдықбаевтар әулеті «Мерейлі отбасы – 2025» байқауында жеңімпаздар қатарынан көрінді
Астанада Республика күні қарсаңында өткен «Мерейлі отбасы – 2025» ұлттық байқауының жеңімпаздарын марапаттау рәсімінде еліміздің әр өңірінен келген 20 үлгілі отбасы құрметке ие болды. Іс-шараға Сенат Төрағасы Мәулен Әшімбаев, мәдениет және ақпарат министрі Аида Балаева және қоғам қайраткерлері қатысты.
Биыл байқауға республика бойынша 3434 өтінім түсіп, өңірлік кезең жеңімпаздары арасынан 20 үздік отбасы анықталды. Оларға естелік мүсінше, диплом және 1 миллион теңге көлемінде ақшалай сертификат табысталды.
Абай облысының намысын Сыдықбаевтар әулеті қорғап, жеңімпаздар қатарынан көрінді. Отағасы Оңғар ата мен жұбайы Тілеуғайша Қасымжанқызы сегіз бала тәрбиелеп өсірген, бүгінде олар 16 немере мен 7 шөберенің ата-әжесі.
«Мерейлі отбасы» ұлттық байқауы – рухани және отбасылық құндылықтар мен отбасы институтын нығайту мақсатында 2014 жылы бастау алған бірегей жоба. Осы жылдар ішінде байқауға 20 мыңнан астам қазақстандық отбасы қатысты.
